اروع قصايد بيرام التونسى

بسم الله الرحمن الرحيم

حاتجن يا ريت يا اخونا
مارحتش لندن ولا باريز

حاتجن يا ريت يا اخونا مارحتش لندن ولا باريز
دى بلاد تمدين ونضافة وذوق ولطافة وحاجة تغيظ

ملاقيتش جدع متعافى وحافى وماشى يقشر خص
ولا شحط مشمرخ افندى معاه عود خلفه ونازل مص
ولا لب أسمر وسودانى وحمص وانزل يا تقزقيز
حاتجن يا ريت يا اخونا مارحتش لندن ولا باريز

ولا عركه فى نص الليل دايره بالحيل وساحبها بوليس
قدامها جدع متجرجر وشه معور قال دا عريس
الخلق ماهى بتتجوز واشمعنى احنا مفيش تميز
حاتجن ياريت يا أخونا مارحتش لندن ولا باريز

ولا واحده فى وش الفجر تبرطع ماليه الدنيا صوات
قال ايه جوز خالتى أم أحمد سلفة أخوها السيد مات
سبحانك ما أعظم شأنك والله الموت دا مفيد ولذيذ
حاتجن يا ريت يا أخونا مارحتش لندن ولا باريز

ولا واحد طالع يجرى وواحد تانى بيجرى وراه
ويقول ها لو حصلتك يا بن اللى ابصر ايه عامل ايه
لا الشارع غيط ياخونا ولا احنا بداره ولا احنا معيز
حاتجن يا ريت يا أخونا مارحتش لندن ولا باريز

ولا واحد بيبيع حاجة يقول بريال وتاخدها بصاغ
يا أخونا دا حتى الابره تاخدها بدوشه وقلب دماغ
حلفان وعراك ومناهده ويمكن ضرب كفوف يا حفيظ
حاتجن يا رت يا أخونا مارحتش لندن ولا باريز

ولا فيش ميت ألف صعيدى بتوع يا نصيب هاجمين ولا فيش
ميت ألف معوض داعس جاى معاه صندوق ورنيش
والله كرهت القهوه وحرمت اقعد عالافاريز
حاتجن يا ريت يا أخونا مارحتس لندن ولا باريز

ولا شفتش ده اللى بلاسه وده اللى بعمه وده بطربوش
ملابسنا ياناس تشكيله تعد اصحابها ما يتعدوش
دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى أخدناه
والله دا عيب نتهجى دروس يا أساتذه على التلاميذ
حاتجن يا ريت ياأخونا مارحتش لندن ولا باريز